ذي ماهي حالة

المهم

كنت ولازلت أحب صديقات ماما اللواتي مايتكلمن

عن البلوح والسمنة والاكل و و و

و بالمقابل  انفر من اللي كل ماتشوفني تقول لماما

وكليها وعدليلها وهاتك ياخلطات و خرامز !

لا و أمقت تلك التي تحكم زندي و تقفل عليه ايدها 

وتقمزلي قائلة " ذي ماهي حالة "

بالنسبة لي كشخصة نحيفة قابلة للاختفاء ،

الاشخاص الي يهتموا بالسمنة اشخاص منفرين تلقائياً

نفس الشي كان خالقلي مع  البنات الي في عمري و مصابات بالسمنة !

تتوقعوا لانهم يظهروا عليا الشمس !؟

معقول معقول لا أستبعد ذلك !

المهم

انا كبرت و عدت نعرف نتعامل مع الوضع 

و نقول لا عادي انا كذا " شيك " و " مودل "

و عدت نفهم كمان انو الرشاقة اناقة

 صح و انو كثير اشياء ممتعة نقد نجربها

 محرومات منها الدبّات

زي الجري و اللعب و توفر مقاسات كل انواع الملابس الجميلة بكثرة

و وكيل شوكولا بدون تأنيب ضمير !

كافي لا نجرح مشاعرهم .. جرح المشاعر مش أوكي زي ماقلت البارح

على فكرة في اشياء كمان يعدلوها الدبيّن

 انا محرومة منها ونفسي نجربها

زي فكرة " أدبّز " على ركاج قاعد .. الين ينطحن

و زي فكرة " اعجّن " على ركاب التاكسي .. الين يختنقوا !

أشياء كذا عنيفة بس ممتعه

المهم انا ماقصدي شي

و كل الفكرة من التدوينة هي اني نحكي قصتي

 او قصصي مع لبلوح D:

لبلوح هذا عشان ماتجي وحدة من ذوك الدلوعات الكيوت الياي 

تقول لبلوح ايش هوا ؟

لبلوح ياقلبي يعني إجبار المخلوقة النحيفة 

على تناول كميات كبيرة من الطعام والشراب

لتصل الى ضعف وزنها الطبيعي 

و لتبدو ممتلئة الجسم وليستدل بوزنها على كثرة خير أهلها

و يرد في ذلك الأمر أمثال جارحة للمشاعر جداً

كان توجه الي بكثرة على مر سنوات عمري :

" لمرة تكبظ من لخلاق لكبظت من الفراش "

و 

.. " لمرة الناكظ ، حشّامة خيمتين " !!

ماكنت نفهموا بس نحس انو شرير

بعد ذاك فهمت انو البنت النحيفة تجلب العار لأسرة امها واسرة ابوها

ياخي مكبرين الفيلم ليش مانعرف

يعني هو شي خاص

انا سمنت نحفت هذا شي راجع لمين ؟

انا ! 

هوما اش يعنيهم ؟

مانعرف

ذاك اليوم وانا عندي يمكن 12 سنة

كانت العطلة الصيفية في المدينة

زرت بيت عمتي .. اللي كل بنات جيرانها صحباتي

كنت نستمتع الين نجيها .. مع ان ماعندها بنات في عمري

و مانقعد في بيتها اصلاً و مابيني معاها اي مشاعر اسرية

يعني عادي .. عمتي و نقيسها نلعب مع صحباتي في الحارة و نرجع لدارنا !

الين ذاك اليوم استغفر الله المانعرف نوصفو باش !

كنت عندها و اقترحت عليا فكرة جهنمية .. كانت جهنمية

و فعلاً طلعت الا جهنم الحمرا

قالتلي نسكن معاها .. تبلحني

نسمن ونعود زي صحباتي

و فنفس الوقت نتم جابرة صحباتي ومشعشعه

و الين نسمن .. يعني نهاية السمستر البلوحي  ،

لاهي تشريلي ارساق " بناجر " من الذهب !

طبعاً انا تحمست للفكرة بمجرد ماعاد فيها 

اني نسكن حذا اصحباتي

فلحرى معاها الذهب و كثير اغراءات :)

قلتلها موافقة !

ياللي يجعلها قولة امباركة

اتصلت هي على اهلي واتفقت معاهم

مشيت انا للدار ورجعت بلباسي و قمة الفرح ياعيني ..

اول يوم .. وعاتني الصباح على كار من النشا

ذاك الي بسببها ماتليت نشربو الى يومنا هذا

شربتو و رقدت

عادت كل ساعه توعيني على كاس من اللبن !

" اح ذا ماتلا امونك يغير عادي اصحباتي

 ندور نهرب معاهم الليل كامل و ماتشوفني ! "

القايلة انطرح مارو .. اللي ابيض من ذي الشاشه الي نكتب عليها حالاً

عالم مولانا الا ابيض ومافيه ملح ولا زيت ولاهم يحزنون

جيرة كبيرة و انا مانعرف ماهو بيضة مقلية ولا بيبسي و شوكولا !

بدأت نوكل وكنت نحاول مانضعف ولا نستسلم ..

و ياك مانطول القصة

بعد مارو كان عندي بريك نلعب و كل ساعه ننجاب 

نشرب كاس حجم عائلي من الحليب

و في الليل عندي 30 لقمة من باسي !

اوك ؟

اول 3 ايام كانت تتسامح معايا كثير

وكانت الغرفة فيها كوة " نافذة " فاتحة على " المنور "

يعني تهوية للعمارة

يعني .. المهم

ذيك الكوة كنت انا نستفيد منها وقت الغدا

تطرحلي مارو وتمشي تعدل همها وتخلي بنتها مسؤولة عني !

والبنت تقفل عليا وتقيس صحباتها !

وانا نكب مارو من الكوة .. الله يعفي عليا و يغفر لي يارب

و في الليل كانت تجي صاحبة عمتي و توكلني باسي

تعطيني 10 لقمات و بريك نص ساعه

و نجري نجري نجري ياك نقد نوكل مرة ثانية

كان عذاب

بس في البداية كنت متماسكة عشان ذيك الساعتين الي نجبر فيها صحباتي !

ذيك الايام مافي جوالات و دار عمتي مافيها تلفون ثابت !

ماكنت نجبر ماما !

عطيت اسبوع بهذا الوضع و بعدين فاض بيا ومليت !

هربت .. بطريقة بريئة

فواحد من بريكاتي سرقت صحون

وقست عمي .. قلتلو قالتلك عمتي تلحقني لماما 

نعطيها صحونها ونسلم عليها

ومشا بيا وتروقت عند الجيران و صار فيلم

في الاخير رجعت لها ورجعت معايا فوف

ياك ماتلات تسول لي نفسي بالهرب قاع !

و المرحلة الثانية كانت اصعب

كان فيها اتقرميص و ازيّار و الكثير من العنف النفسي

انكسر احد اصابع رجلي .. انكسر ! وابرا الحمدلله

و بكات فوف وعيطنا و حسينا اننا مختطفات !

وكلام درامي .. ممكن يلفت انتباه العالم كامل !

يكون بالنسبة للبيظان عادي

شويبات خاسرات وكبظتهم عمتهم ياك تعرفلهم شي

 كانهم يتلوماو و يعودو عل يم شي و ترارارارا

" و مشاعرهم تنحرق مش مهم " !

كان قصد عمتي مصلحتنا و انها تكوّن علايات فالحات او شي ذنبتو

و كان الواقع انها تصدع شخصيات بنتين طبيعيات !

المهم ماعطينا اسبوعين الين قنطت مننا

و اندحست من البكي و المعاناة وطلستنا

فوف كانت قمة في الهدوء ..

 تغش تكب تقذف تعدل كل الجرايم بدون ماتتكلم ولا يبان عليها !

" قملة لقطيف " << جايكم ذاك

انا كنت نبكي و نعيط و نمثل دور الضحية بقوة !

كنت ندعي على عمتي فوجهها

ونقولها انها ادور تخش النار و الله مانسامحها !

استغفر الله كنت فاهمة غلط D:

و ذا كان السبب في اني اكثر من تضرر :(

" عريش لعلندة " << جايكم املي

المهم

انتهات ذيك المعركة بسلام و خيبة امل بالنسبة للعمة الغالية

و فخر انتصار بالنسبة لي انا وفوف

و بعد ياسر ياسر من العذاب

اللي ممكن مايجد على اي انسان ماعاشوا

اني مزلت نعاني من تأثيراتو عليا !

و منها انو علاقتي بعمتي الين ظرك ماهي سليمة مية مية !

مع اني والله الا نبقيها وتضحكني ذكرياتي المميزة معاها

دوناً عن كل أهلي :)

زوينة الحياة و مشيها وتعاقيبها

زوين انو في ناس تحارب عشان تنحف

و في ناس تتعذب من الجوع

و في ناس تتبلح و ناس مالهاش نفس توكل 

و ناس وناس وناس

بعد كم سنة والين جينا هون

واول مرة نقيس فيها البادية

قست عمي انا وفوف

كانت الاجواء جنونية .. رهيبة ولا أحلى فيلم هندي

كانت عندي مسجلة صغيرة والبوم كاظم أحبيني

ذيك ايام طلوعو <3

اول ايام كنت خاطرة و اطواجين و الدنيا هااااانية

عاقب ذاك جات البقرة وانقالي هذه بقرتك

كَرت فيا الين ذاك اني عدت ببقرتي

وعايشه الدور

ذيك الايام كان يجي برنامج الوادي حق هيفاء وهبي

وانا جاد عليا اني كيفتها و نظل عياطي قايم

" ع الطبيعه كل شي احلى

الدنيا حلوة العمر بيحلى .. "

وفات ايام الضيافة و الرخاء و انقالي بسم الله لبلوح

مانك لاهي ترجعي لوالدتك يكون طفلة قد ذي الدار !

" اصلا ماعندهم ديار " p:

كان الوضع في النهار معقول و نقد نتفاهم مع اللبن فيه

السر كان في الليل !

نحن كانت كل وحدة مننا عندها سيوة " سطل "

لاهي تشرب مليتها مرة في الليل و مرة في النهار

و بينهم اتم الا تشرب في الشنين 

والاكل بسيط جداً .. يعني كل الجهد على الشراب !

بس كانت عندهم قوانين عجيبة في الشراب

تخيلوا ! تخيلوا

انا الي جربت الموضوع مزلت نستغرب

تخيلوا الصباح اول مانوعى قبل لا تظهر الشمس

ينعطالي مقرج ملان من الما

وانا اصلا موية البادية تعذبني طعمتها !

المهم المقرج لازم نشربو كامل !

هذا وانا مانشرب فكاسات بلاستيك اصلاً !

نشربوا و المطلوب اني نقذفو " نستفرغو " الله يكرمكم !

قال اش قال ينظف المعدة ..

اول مرة نشوف حد يمصمص كرشو D:

بعدين اول ماننظف معدتي بعد النوم

نشرب كاس صغير من اللبن الرايب !

و نعطي ساعة و يجيني لبن البقرة حامي

و بسم الله

نشرب شوي شوي في البداية و ممتع

بعدها يبدأ يبرد و تجي فوقو الفرارة 

" ذي الكلمة تضحكني "

المهم الين يبرد يعود يكتل :(

مايقد ينظاق :(

و تبدأ الحرب

و يتمو يقرمصوني 

زي ماتشوفو في البرامج الي عن لبلوح وذا النوع

الا انو في البادية ماعدلولي ازيّار 

بس كانت زوجة عمي الشيبانية يرحمها 

تقرمص رقبتي تقرميصة

عالم مولانا الا اخير منها الفناء :(

و على فكرة هي كسرت مسجلتي في يوم جميل :(

بيها اننا نهربوا بيها شور الخلوة عن شرابنا ونوحلوفي الرقص

و كانت تلمّ عننا حب سيس و معدلتنا الا في غوانتنامو لبلوح

الله يغفرلها اشهدوا اني مسامحتها مسامحتها

المهم كانت تقرمصني الين نشرب ذا فر

وعاقبها لبقيت نقذفو والله شي يعنيني :(

كنت نحس اني مضطهدة والله

كانت عندي كتب جايبتها نقراها

ولا قريت ماهو عناوينها 

انسدت نفسي عن كل شي :(

والمشكلة ان ذو برانيين ومانعرفهم وماني كابرة معاهم

و مانقد نقول شي ولا نعترض 

وانا كأني امرة مظبوطة ممشيتني والدتي لاهلي !

ولانقد نمشي سابق ماوفا لخريف ياللي لايشقيني منو !

بعدين 

تخيلوا

كنت الين نصلي لعشا نطرح راصي ونرقد مباشرة 

وتبقى فوف سهرانة مع اهلها مقسلهم 

المهم

الين يجي لبني

توعيني فوف عليه

واتم كل ساعه توعيني على جويرة و نشربها بالعجلة ياك نرقد

و نرجع راقدة !

ويثقل عليا بشكل ماهو طبيعي

 ونبات اخر الليل الا لاهي نختنق بيا ثقلو :(

ومانقد نتكلم بيا الناس رقود ومانقد نوخظ وحدي 

ونبات الا نشهّد و نبكي :(

ولاهي نعقب بعد ذاك نكتشف ان فوف 

كانت تسقيني لبني و لبنها هي !

بما اني راقدة ومانحسب اجويرات 

!

" لايضحك حد ! "

الين فطنت لها وقلتهالهم وقمت نبكي وماتلات على شي بعد

عادو يقولوها الا " قملة لقطيف " تعظ ماتبان 

كل شي تقد تعدلو ما انفطن لها بيها البراءة

وانا مسيكينه دهرا معدلة مجرمة و اتفو بيا !

وانا مانعدل شي وماعندي شي لشي :(

و سماووني " عريش لعلندة "

قالو انو عرش من شجرة ولا شي ذنبتو

زوين زوين زوين يغير مايقد يسند وحدو

لابدالو من شي يسند عليه بيه اضعيف D:

فتحوا فينا ذيك الايام

المهم فوتنا معاهم شهرين

رجعت من عندهم زايد وزني شوي

يغير خارج نطاق التغطية 

مصدومة ولا مانعرف 

و من بعدها قست رجعت لهم مرتين كلهم

مانفوت اكثر من 15 يوم ونهرب 

و الحياة هيك ماشية

و لسه الشعب يبلح بناتو ويحاول يسمنهم

ولسه انا قالبة اهلي وقالبة القلابة !

بس عندي رصيد ذكريات كبير مع لبلوح

نحكيه لحفيداتي ان شاءالله <3

 وعلى فكرة في حد قالي اني مؤخراً عدت مقسولة و اشياء كدا

وللتنبيه حبيت نقولكم ان هذه ماهي تدِوينة كوميدية ولا قريب منها !

هذه معاناة وحدة تعبرعن مليون شويبة موريتانية

عاشوا نفس الاحداث مع اختلاف ألوان الجيرات

 و الكيران و اماكن اتقرميص !

شكراً لي مرة أخرى

monte escalier