يالله يا غفار
سهّل لنا كل الصعاب
و نجنّا من كربة مظلم سردابها
*تدوينة منفجرة*
لاحظت مؤخراً انني و على غير عادتي لم أكتب قائمة أمنيات
لهذه السنة
نوع جديد من التفاؤل
قررت نخليها سنة عفوية مفاجائاتية ..
كل شي يجي ماكنت متوقعتو
و نحاول مانتوقع اي شي و لا نخطط لأي شي
غير طبعاً اني نكون أقرب إلى الله و أكثر بروراً بوالديا
و أكثر مرحاً و جنوناً و أقل عصبية و ضيق اخلاك
هيك اشياء
نبقيها تعود سنة حلوة وبس
وعندي احساس انها فعلاً سنة حلوة بجد
ان شاءالله ان شاءالله
اول شهرين منها كانوا مميزين بكثير اشياء
زي مثلا فرحتي بزواج ثنتين من اعز صحباتي
زي مثلا اني وسعت دائرة اهتماماتي و صارت عندي اشياء اكثر
نوحل فيها غير التلواد لشي نوحل فيه !
زي مثلاً اني ... ولا بلاش
المهم
ماما سافرت لها اسبوع زمان
و انا حاسه كأنها سنة :(
توحشتها
البيت من دونها مالو قيمة
ثاني يوم من سفرها
طلعت للمعهد و انا فوسط الدرس رن جوالي
طلعلي اسمها و صورتها !
قمت نجري الناس استغربوا انا امالي
حتى ما استأذنت
اول ماخرجت رديت ألووو!
طلعت لي فوف :(
تذكرت ان جوال ماما بقا عندنا !
لا إرادياً بكيت قلتلها سلعتيني شكيت انك ماما !
هذا هو الشعور الي قصدي عليه
خيبه كذا نحسو بيها
لما نفرحووووا بشي و فجأة فلحظة نكتشفوا اننا غلطانين
هذه الايام انا كل شوي يسلعني شي
مانعرف انا الي صايرة مسلوعه ولا الناس الي بتستعبط عليا !
وغالباً الأولى حق :(
يعطيني المحور
ذيك الليلة فجأة واحنا قاعدين في غرفتنا
شمينا ريحة دخان سجاير
انا قلت لعفاف .. شميتي الريحة ؟
قالتلي حتتته و قريب قاع !
عيطت فايزة من ركن الغرفة .. والله ماهي انا ، والله ماهي انا !!
ان شاءالله ماتفهموها هاع
اتفو بيا
تعرفوا
الين تكون مانك متعود مثلا يعني توكل بسرعة !
مثلاً اوكي ؟
و في يوم كنت جيعان و مستعجل و فنفس الوقت قدامك اكلة شهية !
و لا ارادياُ قررت انك توكل بأسرع شكل ممكن
تلتهم الصحن وخلاص
و لو انكب عليك ولو توسخ وجهك و لو انحرق لسانك حته
مش مهم !؟
وفعلاً تبدا في الهجوم .. و فجأة ولسوء حظك
يظهر فوجهك شخص
يعرفك بس اول مرة يشوفك توكل !
تخيل الفكرة الي لاهي يكونها عنك !
انك دايما هيك :/
ممكن انك مقرف !
ممكن انك غريب الاطوار !
كل فكرة ممكن يكونها و تجد عليه الا فكرة وحدة
ان هذه اول مرة توكل فيها بذا الشكل !
ولو قعدت تبرر وتشرح لن يفهم ولو فهم ماهو لاهي يقتنع !
عشان كذا مايكون بيدك غير تخليه .. يمكن يجي يوم ويشوفك تاكل بأدب
و يغير رأيو
او ما يغيرو تلك مشكلته !!
هذه الموقف الغبي تماماً انا صارلي مؤخراً
بس طبعاً ماهو في الاكل D:
في مرحلة من البرد يوصلها الانسان
تعود مجرد قطعة قماش مقاسها قد كف ايدو
ممكن تدفيه او تخفف من بردو
زي مرات نوعى في الليل متجمدة
نعود ناسية بطانيتي
ندخل كرعيا في الستارة او تحت وسادة
ندفى !
مع انو لما تكون عندي بطانية
نحس اني محتاجة وحدة ثانية !
و نفس الشي في الجوع
في مرحلة منو تخليني ممكن نوكل اي شي انا بالعادة مانوكلوا
ممكن تخليني نفكر في مارو الحوت مثلاً
المهم حاجة تنكال حتى لو راص امبوراية يابس !
وفعلا نوكلها وبشهية
مع انو لو كنت دون ذيك المرحلة شوي يستحيل نوكلها !
و في الارهاق كمان
نوصلو درجة من الارهاق تخلينا ممكن نرقدوا ونحلموا احلام سعيدة كمان
واحنا مسندين راسنا على طاولة قاسية و فوسط ضجيج قاتل
وتصير بالنسبة لنا اريح رقدة !
مع اننا في العادة مانقدو نرقدوا الا في هدوء تام و عتمة و وو
وذا يصير لكل الناس ياحبيبي
و نفس الشششي كمان في مرحلة من الفراغ العاطفي
يوصل لها الانسان يصير ممكن يرضى بأي نوع من انواع الاشباع العاطفي
حتى لو كان حب متأكد انو عابر او سخيف او بلا فايدة
حتى لو ماجا نقطة وحدة من احلامه !
في البرد و الجوع و الارهاق و في كل حالات الكون ممكن نتحملها
الا العاطفة .. مانبقي نوصل لذي الدرجة ابداً
ومانبقي يوصلها حد
و نكون انا بالنسبة لو مارو الحوت
او طرف الستارة او حتى سطح الطاولة القاسي ..
مانبقي نعود تمشية حال .!
ليه ساكت وداخلك زحمة حكي ؟
ليه تضحك و فيك عبرات وبكي ؟
يا للقهر
لما حد يقولي كلام و ننصدم و نسكت
ونصير كأني غبيه
ومجرد مايعطيني ظهرو
نلاقي كل الاجوبة القاتلة لشخصيته !
بس بعد اش ؟
والله اوقات نقول ياريت نقد نضغط ريبلاي
و نقول الي فخلاكي !
اليوم جاتني عدة مكالمات مميزة
انبسطت بيها
مع اني مريضة و ماني مرتاحة نفسياً
بس ضحكت .. :)
قبيل كنت نكلم صديق عزيز بعض الشيء
من خلال نقاش سخيف بيننا
قالي اني " ماني محترمة "
مانعرف .. ماحبيت نسولوا ليش
لان سؤالي ممكن يكون قبول لحكمو
قلتلو شكراً و انتهى الأمر
بس اللي مايعرفوا هو
اني قعدت ساعة زمان بحث عن السبب الي خلاه يقول هيك !
ممكن يمزح على فكرة و ممكن ماهي حق عندو
و ذا كلو مجرد سوء تفاهم
بس انا حسيت فعلاً اني محتاجة نكون محترمة اكثر من حالتي ..!
يلا ماعلينا
كنت قاعدة نتيي لعفاف
قالت منوتا المتروشة ان لقراية يوم الاحد
قلت انا اتفو ماني رافة عليها !
قالت فوف بانفعاااااال
والله والله يدنك تطلعي !
قلتلها انا اثري قلت اني ماني طالعه ؟
قالتلي ابدي قلتي انك مانك رافة عليها !
قلتلها وانا اثري مانعدل يكون شي رافة عليه ؟
قالتلي اهيه نعرفك
قلتلها لعاد ذاك وهاي جاية تيي انا ماني رافة على نتيي D:
المهم انها كانت لاهي تبطني p:
الدلع و الاهتمام الي يحسسوني بيه اهلي في غياب ماما
مايفرحني !
بالعكس يطعنني !
الله يغنيني بيها عن كل الناس <3
( دايم قمة الاشياء بداية عكسها دايم )
جملة قالتها نوال في اغنية
عطيت ساعة نحللها نبقي نكتشف انها تجنن راصها و تغني شي بلا معنى ونقولها لصحباتي !
وعقبت اكتشفت انها صالحة يكون قالبني نشرحها حالا ^_^
المهم انها كسحتني ..
مانعرف نتعامل مع الاشخاص الغامضين
يوتروني :/
ياما عيون شاغلوني
لكن ولا شغلوني
إلا عيونك انتا
دول بس الي خدوني خدوني
وبحبك امرووني .. ترارارا
وانا نقرا رواية الاسود يليق بك
من اسبوع تقريباً وقفت عند وحدة من الصفحات
فيها بطلة الرواية تنتظر اتصال من بطل الرواية
و من شدة ماكنت عايشه معاها لحظة بلحظة
و من وقت ماوقفت قراءة لظروف جبارة
وانا نحاني ذاك الاتصال !
و كل يوم نحس انو فخلاكي حد نحانيه يتصل
ومانعرف منهو الين نتلا نتخمم
ذهوا الا طلال صاحب الرواية !
مانعرف اي وصف نوصف بيه حالتي الانسجامية مع كل رواية نقراها
كل رواية .. نعيش فيها غصبا عني !
مع اني مانقرا بتركيز الا في حالات نادرة
و دايما نسمع موسيقى مع لقراية
و دايما نقرا حذا اهلي و الاصوات و هكا !
ماني فاهمتني ..
امتحاناتي للسمستر 5
كانت في قاعة في الجامعه
طول ايام الامتحان كان في سؤال مكتوب على السبورة
و كل يوم جيت فيه نقراه
و يمكن اغلب الطلاب قراووه
بس متأكدة ان مافي حد غيري فكر فيه
كان السؤال كالتالي :
" كيف يمكن اعتبار قاريء الأدب منطلقاً لتأريخه ؟ "
مافي مادة امتحنت فيها ماضيعت ربع وقتها في التفكير في هذا السؤال
وتخيلوا اني للآن ماجاوبتوا !
بس صراحة سؤال يفتح النفس حاسه انو سؤال أنيق <3
ياسعد اهل الأدب العربي :(
متوحشة انسانات و انسانين كثير
هذه الدنيا مالها أمان هي الحق :(
الله لا يشغلنا بيها
عندي كلام كثير
بس لأنو مافي شي يضحك ولا افيلح
ماني قايلتو
كافيني ذا من الكدر !
حاسه اني عدت مقسولة :(
<< الثقة ، كأني كنت افيلحه *_*
بس والله الحياة حلوة
حلوة
ح ل و ة
اضحكوا الدحسه مكدركم
:)
ليست هناك تعليقات:
إرسال تعليق