من فضلك لا تقرأ هذه التدوينة

سألتني جواهر .. انتي ماتكتبي الا وانتي تعبانه ..

نبغى نقولها أنا ياجواهر مانكتب الا لما نتألم من شي ..

نوع من العلاج عندي اني نكتب ننزوى ف مكان مظلم 
نحضن وسادتي المربعة و ناخد نفس عميق و نبدا .. نطقطق ع الكيبورد 

سواء كان ألمي جسدي أو معنوي 

لما نحس ان شي يوجعني يخنقني الكلام و نصير نبقي نكتب

أحيانا نكتب أشياء تضحك و انا نبكي .. 

عادي المهم اني نرتاح ..

يعني البعض شاكين اني نكتب لهم

عشان نلهيهم أو عشان نعطيهم أخباري

أو عشان ماعندي شي نوحل فيه 

أو لأني سخيفه أو لأني ثرثارة 
أو لأني عبيطه أو أي شي 

حقيقي ماتهمني أفكارهم  عني 
حتى اللي يحبوني و يحبوني نكتب و يحبوا يقراو كلامي
وحتى اللي يكرهوني و اللي يقولوا الدحسه لما يشوفوني نشرت تدوينة
و اللي نوجعلهم راسهم و اللي يعشقوني 
واللي أنا آخر همهم .. اللي بالنسبة لهم شي مهمش مايلفت انتباههم 

كاملين مايهموني .. لما نكون نتوجع و نكتب مانفكر فيهم
مانفكر غير ف نفسي .. أنانية زي كل الناس
و  مؤمنة أنو مافي حد ف الدنيا ممكن يحس بيا زيي أنا 
أو يهتم أو يهتم يعني بوجعي زي ما أنا نهتم ..

أنا الوحيدة الي نتم نتوجع معايا ومانضحك ومانفرح الين نفرح معايا
مستحيل نضحك وانا مكدرة .. احتراماً لأوجاعي يعني 

ياخي محترمة معايا .. قال الفايت انا رومنسي جداً 
شكلي ف الاخير حتجوزني D:



ياربببببببببي ياربي ي ربي ييياربي

مش معقول كمية الألم اللي حاسه بيها ..

قد ماني متأكدة اني ف يوم راح نتذكر شعوري هذا

ونقرا كلامي هذا و ننقهر على كل دمعة و كل كلمة و كل شهقة شهقتها ..

بس عادي قريت مرة انو المفروض مانندموا على اي شي عدلناه مهما حسيناه غبي .. 

لأننا وقت ماعدلناه كنا شايفينوا صح !


وانا شايفه اني صح نبكي و صح نشهق و صح كمان نكتب !


عشان مانختنق بس ..

انقالتلي ذاك اليوم جملة عمري ما انقالي اصدق منها ..

"المشكلة انك دايما توقدي اشيائك"

فعلا .. المشكلة اني دايما دايما دايما نوقد اشيائي

و نوقد قلبي و نوقد اللي نحبهم و نوقد كل شي نحبو !

ليش؟ مانعرف !

يقولوا ان الحريص دايما مايستنفع من مالو

يمكن بيا الحرص يمكن لأني لما نحب حاجه نحافظ عليها بزيادة

زي كرتات الميموري الضايعين مني وماني عارفه لامتهم فين ..

زي ساعتي اللي نحبها .. دايما مضيعتها و دايما نجبرني لامتها بعييييد 

ونتذكر وقت مالميتها !

و نلبسها شوي ونخاف تتجرح نقوم نرجع نلمها ف مكان ثاني بعيد وننساه و توقد عليا 




وهكذا طول الزمن !

شكلو عشان كذا نخسر الناس الي نحبهم كمان



لأني نداريهم و نحافظ عليهم اكثر من روحي

لأني ننسى فيهم نفسي .. ننساني تماما

نهتم نهتم نهتم انا مهووسة اهتمام ..

نخاف نخاف نخاف و نوسوس ونتم نحجب عليهم 

و نتطمن انهم معايا طول الوقت 

و نقلق نقلق نقلق انا مخي كومة قلق ،

لحد مايضيعو مني !

شي غريب ..

شي يخليني مرات نتمنى نكون عديمة احساس

هيك يعني زي مليكه زي منتو زي هبه زي لعزوز زي كل صحباتي الطبيعيات 

اللي مايبكوا لما تضيع منهم كرت ميموري

و مايبكوا لما تنقسهم الكحه و مايبكوا ب افراط زيي أنا لما حد يألمهم  بكلامو ..

نفسي نكبر ، قصدي قلبي يكبر

نفسي نشوفني يوم مانحس .. كيف الواحد يبطل يحس؟

كيييييييييف ؟

تعبت !



من اللي قال لك اني أبقدر

انا اقدر كل شي ، فراق م اقدر !

نبغى حضن !!


بعض الخيبات زي الموت 

مهما كنا متوقعينو و متأكدددددددين انو جاي و انو لا محالة سيكون عاجلاً أو آجلا 

لازم لما يجي نتألمو .. ألم المفاجأة و والصدمة و الخوف و تجينا رجفة الوجع !

كأننا ماكنا عارفين و كأننا ناسيين و كأننا مجانين ..

كيف نتفاجئوا من شي مستنيينو من زمان

كيف نتوجعوا من شي كنا عارفين انو جاي 

كيف ؟ أغبياء نحن !


نكره نلوم حد .. نكرررررره نلوم حد

ممكن نعذب نفسي باللوم .. ولا نلوم حد على شي عدلولي

اللوم شي غبي أصلا ! نلومك ليش و انت بكامل قواك العقلية عدلت اللي معدلو 

نلومك ليش وانت عدلتو خلاص !

شنهي فكرة اللوم ؟ 

مانعرف .. المهم اني نكره  نلوم ..



مرات يقولك حد كلمة من حرها ماتعرفي كانك  تبكي ولا تضحكي

تجاوبيه ولا لا .. سبحان الله كيف الكلام ممكن يكون قاسي

ويوجع أكثر من كل شي فالدنيا ..


تكون كلمة عادية .. قايلها بشكل عادي

وقال معاها  كلام كثير مؤلم .. بس الكلمة وحدها أثرت فيك

وحدها خربشت قلبك الين عيطت ..

و الحر  فالموضوع انو ماينتبه .. ولو انتبه يبدا يعتذرلك عن كل الكلام

الا الكلمة الي كتلتك .. العادية ف نظره ..!

ماينتبه لها .. ومايحس بيها .. وممكن يعتبرك سخيف لو عرف انها هي اللي جرحتك !


طب أنا سخيفه .. ربي خلقني كدا 

وماحد يقد يعترض وماحد يقد يغيرني ..


و أصلا كل الناس زيي .. حتى الي مايبين عليهم

كلهم يتأثرو و يحزنو و يبكو .. حتى لو يقفلوا عليهم الحمام ويبكوا فيه

ماهو ذنبي اني ممكن نبكي قدام العالم كامل مجرد مانتألم 

ماهو ذنبي اني لما نحزن ماعاد يفرق معايا شي ..

ماهو ذنبي اني غبيه ..

كل سطر كتبتو من الكلام الي فوق .. نفكر عندو كاني ننشر التدوينة ولا ماننشرها !

مرات نكره حد يشوفني ضعيفه أو منهارة أو مكدرة

ومرات زي ذحين آخر همي كيف يشوفوني الناس ..

مانبغى حد يقولي سلامتك و لا حد يسولني أمالك 

مايخصكم .. لو كنت نبقي نكلم حد منكم كنت كلمتو

بس أنا نبقي نكلم نفسي .. نكتبلي و بس !

أنا وحدي اللي نعرفني و نعرف كل شي عني

نعرف ش يوجعني و نعرف اش نحتاج 

انا وحدي اللي نعرف كل ذكرياتي 

ونعرف عدد المرات الي انخذلت فيها من ناس

و نعرف الاسباب و نعرف اش صار 

ونعرف قلبي و نعرف ليش نكون قاسيه لما نتألم

أنا وحدي نعذرني لما  نكون قاسيه .. لأني وحدي حاسه باللي فيا

فكرة اني وحدي اللي نقد نفكر و نقول .. 

فاكرة يوم ماصار كذا و حلفتي انو مايتكرر .. و تكرر 

أنا وحدي يحق لي نلومني و يحق لي نقول اني غبيه

لأني فاهمة اش قصدي .. 

كلام كذا يدور ف مخي الزبدة منو

إني وحدي .. إني حاسه إني لوحدي 

وان كل الناس لو كانوا حولي مايكفوني

ومانبغاهم و اني نتألم و اني نبكي و اني ماني محتاجه تعاطف حد ولا مواساة حد

أنا اكثر وحدة ف الدنيا تعرف تتعاطف وتنصح .. و أكثر وحدة تعرف تقول كلام حلو

و أكثر وحدة ممكن تحسسك ان الحياة جميلة .. أنا

ف أكيد ماني محتاجه حد قد ماني محتاجة نفسي 

نفسي الطبيعية  اللي كل فترة نفقد منها جزء غصباً عني 

نفسي الخبله الزويقله الحلوه  على قولة أمين الله يرحمو

المدسوسة ف كل حرف ف مدونتي 

محتاجتها .. يارب نلاقيني  !




في أشياء  وتفاصيل للأسف مسحتها لأني مانقد نقولهالي قدام حد 

اشياء بيني وبيني .. باقي فيا اني مانقد نفكر ننشرها ..

بس بسيطه .. قلبي قوي ويتحملها !


يارب يارب يارب ...

monte escalier