استعجلت الرحيل .. ورحلت في غير أوانك
هنا خطوط أيديك .. صمتك .. صدى صوتك .. عنفوانك
هنا ضحكت .. هنا بكيت.. هنا على صدري غفيت
هنا تصاويرك على حايط البيت
هنا على كتفي لعبت لعب الأطفال
هنا بقايا من بقايا أمنياتك رحلت أنت وهي ظلت في مكانك
في وجوه الناس أطالع وجهك الحاضر الغايب
وين أنت؟؟ ومتى أشوفك؟؟ وحدي أسأل وحدي أجاوب
حتى في أصغر أشيائك أبقى أتأمل وأراقب
استجدي صوتك .. استجدي وجهك .. ولو في لحظة وهم
جمدت الدمعة بعيوني وأنت إحساس القلم
هنا خطوط أيديك .. صمتك .. صدى صوتك .. عنفوانك
هنا ضحكت .. هنا بكيت.. هنا على صدري غفيت
هنا تصاويرك على حايط البيت
هنا على كتفي لعبت لعب الأطفال
هنا بقايا من بقايا أمنياتك رحلت أنت وهي ظلت في مكانك
في وجوه الناس أطالع وجهك الحاضر الغايب
وين أنت؟؟ ومتى أشوفك؟؟ وحدي أسأل وحدي أجاوب
حتى في أصغر أشيائك أبقى أتأمل وأراقب
استجدي صوتك .. استجدي وجهك .. ولو في لحظة وهم
جمدت الدمعة بعيوني وأنت إحساس القلم
...
ملاحظة : هذه التدوينة للبكاء فقط !
يستحق .. يستحق دموعي و ألمي و وجعي
أمين بوكا
مانعرف .. مانعرف كيف نعبر عن اللي انا حاسه بيه
وماحد متخيلو في الدنيا
تعرفوا الشعور لما تحس انك تحتقر الدنيا
ماهي شي .. وربي ماهي شي
عارفه اني نكدر عليكم و نعطي للي حولي انطباع أليم
و ننشر شعور سلبي في الي حولي
بس عادي ماني مهتمه
الفكرة مألمتني جداً
حاسه اني لو بكيت سنين مايبرد قلبي
انا مؤمنة .. مؤمنة جداً
وماني معترضة على وفاة أمين الله يرحمه
ولا على وفاة الي اغلى منه بعد عمر طويل يارب
ولا حتى على وفاتي انا
ومانقد نعترض اصلاً
لأن هذا هو الوضع الصحيح
فكرة الموت هي الفكرة الحقيقيه الوحيدة في حياتنا
كل شي كل شي قابل للتغيير .. للعدول
ل أنو مايحصل او يتأجل
الا الموت
و هذا الشي من كثر ماني واثقه منو ماتلا يكدر عليا
الموت بنظري بداية .. ماهي نهاية
لكن الفكرة الأليمة
وقت الموت .. طريقة الموت .. السبة
الظروف وقتها !
تعرفوا امين هذا منهو
انا عمري فحياتي ماتخيلت نكتب عن امين و نقول الله يرحمه
اخر شي كنت نتوقعوا .. و دائماً كنت حاسه اني لاهي نموت سابقو
و نحسبه من الاشخاص الي لاهي يدعولي طول عمرهم بالرحمة
كنت واثقة !!!
أمين صديقي و خويا
امس توفى
تحت انقاض جمعية الثقافة والفنون الي كان يشتغل فيها
في المدينة المنورة
انا ماكنت نعرفوا .. جمعتنا ظروف و عاش معانا في دارنا
من يوم 5 / 5 / 2009
الين يوم 6 / 10 / 2009
بالتمام
عشنا في هذه الفترة ايام لا تتكرر
وفي المرات الاخير الي كان يكلمني في الفيسبوك
كنا دايما نقولو انها ايام لاتتكرر و لن تتكرر !
ايام ماجانا انا كنت نقول لسويسه ..
اني من زمان نتمنى يكون عندي اخ قريب مني في السن
مجنون كيفتي و يحب الحياة
يكون اخويا و صديقي فنفس الوقت
واني لقيتو
امين كان اخونا الحنون .. كان صديقي
و صديق مؤيد و المجنون الي مالي بيتنا فرح
صام معانا رمضان
كنا نوعاو الظهر .. نصلو الظهر
يقعد امين في المجلس يقرا قرآن
واحياناْ نجبروه واعي قبلنا و قاعد يقرا قرآن
( كنت نخاف عليه وانا عارفه انو يدخن و مجنون
و مرح بزيادة و معدل شعرو كدش كبير
بس لما نشوفو يقرا قرآن نتطمن عليه )
نتفرجو برنامج خواطر الي كان يحبو جداً
الساعه 3 الظهرنخرصوه كلناا سوى
و اول مايوفى ننطلقو
نجهزوا الفطور
انا و فوف في المطبخ
و امين كان لازم يساعدنا
احيانا ينظف البيت مع فيو و مؤيد
في مرة جا وقالنا خلوني نعدل لكم فطاير
ماكان يعرف !
وقعد يلعب في المطبخ و انا وفوف نساعدوه
ماننسى ذاك اليوم انا رشيتو بالدقيق وادخل فعينو ووجعتو
عاد يقولي تعينتي فيا يا آيّا
...
في مرة كنا نفطرو كلنا سوى
و هو لأنو الغريب القريب الوحيد في الدار
كنا الين مايكون فم حد من الرجال .. نفطروه معانا
ماما تقول ان متعة الفطور في لمة العيلة
وانو حرام نخلوه يحس بالغربة بين اهلو
كنا نفطرو وبعد ماخلصنا ودعينا
وبدأنا نقومو لاهي نصلو
قامت ماما اول وحدة
جا امين لاهي يقوم بعدها
و طبعاً مايقد يقوم بشكل طبيعي
كب على راسي كاسة مويه باااردة و مشا بهدوء
انا من شدة الصدمة ماتحركت !
اساساً هو معدلها مخلص مني
لأني قط كبيت ثلج على راسو
وكنت دايما نطفي التلفزيون في وجهو
و لمانوخظ بينو هو والتلفزيون يقولي حوووزي
نقوم نمشي بالبططططيء عشان نطعنو
مايعدلي شي .. بس يهددني
ويتم يقول ماااما .. مااما احكمي عني آيا
كأنها آيا لاصقة في وجهك مدبك << كنت نجاوبو كذا
و تقوم ماما عليا انا
انتي لاهي تجني !!
خلي عنك اطفل !
امين الوحيد الي ماعمرو قالي اسمي
ماكان يقولي غير آيّا ..
وفي مرة ألف لي اغنية و لحنها
حفظها لمؤيد و جاو غناووهالي سوى
كانت مفاجئة مجنونة
ايامها انا كنت نعدل باك و طول الوقت متوترة ونبكي
فرحوني جداً و عطيت فترة نغنيها لنفسي كل مانتضايق
الاغنية :
شو بحبك يا آيّا شو بحبك
بجنونك بطفولتك بضل بحبك
لما بتطلي علينا بتنور الدني
و بتفرح العيون بشوفتك ياعيوني
انتي حياتي و انتي المنى
و بقربي منك بعيش الهنا
،،،
كانت لما تقبظني الحمى و نمرض
نعطي ايام راسي يوجعني بعدها
ومانقد نحركو
كان يضحك فيا
يقول : راس آيّا فيه خلية وحدة
لما تتحرك تخبط في الحيوط و توجعك
مخ فاضي مافي الا خلية تتكركر
و كل يوم يقولي كيف الخلية اليوم
نقولو خليها ثابته اخير فيك !
...
أمين علمني اشياء كثير في الحياة
علمني نكون مجنونة .. علمني نفرح بدون قيود
علمني نتجرأ على كل شي نخاف منو
علمنا نلعبو
1 2 3 4 بيب 6 7 8 9 بيب
لعبة حلوة بس حلوة مع امين وحدو
...
هو اول شخص خلاني انا وفوف نتجرأو و نطلعو مقهى فندق الخيمة
عزمنا على كباتشينو في ليلة كنا جايين من المرصة
يومها كانت اشكالنا مبهدلة و لباسنا مش ولابد
كان يقولنا عاااادي عيشو حياتكم
اهم شي انتوما تنبسطو مايعنيكم في العالم
حمّسنا وطلعنا .. فرحنا جداً
ورجعنا البيت بسلام
...
في ليلة جينا الساعه 1 في الليل
انا و هو و فوف
كنا في حفلة من حفلات الانتخابات ايامها
رجعنا متأخرين و حاسين اننا مجرمين و مرة خايفين
لما رجعنا كان حذا بيتنا في شارع جديد
مكيفنهم معدلينو .. و كان الجو ظلمة و هااادي
انا قلتلهم خلونا نمشو في وسط الشارع محدو جديد
ممتع !
قال نتسابقو !؟
انا جريت بدون تردد
تسابقنا وانا وصلت سابقهم .. انقطعت نفسي وضحكت بقوة
رجعنا للبيت بسلام !
....
أمين كان بار جداً بوالدته
كان مدلعها كأنها بنتو .. لما نسمعو كلامو معاها نضحكو كلنا
في مرة قالولو انها مريضة !
شفتو متروق و يبكي .. يبكي
،،،
بعد فترة معانا كلنااا
ماما وانا وفوف و فيو و مؤيد
اقنعناه يحلق شعرو الطويل
عدلهالنا مفاجأة .. جانا ليلة محلق على خفيييف
قمنا نعيييييطو
عدلنالو حفلة ذيك الليلة
حتى ماما قعدت تدعيلو وتبارك له
و وعدنا مايرجع يطول شعرو مرة ثانية
،،،
كان خلوق بشكل عجيب
محترم بمعنى الكلمة
كان الجميع يبقيه و يحترمه
حتى الجيران
كل الي يعرفوه احترموه ..
ماما اليوم قالت جملة غريبة
دايما نسمعها عند الناس
انو الناس الطيبين جداً
مايعيشو فترة طويلة
الزين حته عمرو مايطوال ولا شي زي كذا
وانو الموت تنقي البشر
كأنها تنقي من صحن تمر .. تنقي الاجمل و الافضل اولاً !!
قتيل الهدم شهيد
وان شاءالله ربي يتقبل امين من الشهداء يارب
في كثييييير كلام في بالي
مشوشة من كثرة الافكار
كنت شاكه ان ذاكرتي ضعيفة
طلعت ماني ناسية اي لحظة من ايامو معانا
كنت محتاجة تنبيه بس
وماكنت نتمناه يكون بهذه الشدة
بس لاحول ولا قوة الا بالله
كل الاشياء الجميلة الي نعرفها في امين
ماكنت نبغي نقولها
حتى هو ماكان يعطيني فرصة نقولو كلمة شكراً بس
بس مانقد مانقول .. مانقد مانتكلم
قبل لانكتب هذا الكلام كامل
انا كانت دمعتي في عيني طول الوقت
ذحين حاسه اني بكيت بكيت
بكيت دموع وبكيت كلام وبكيت افكار !
اليوم كان عندي اختبار ..
متأكدة ان نتيجتي 0
مانعرف اش كتبت و لا اش عدلت
كنت نبكي وسط الاختبار
كانوا الطالبات متخيلين اني نبكي لان المادة صعبة
ويقولولي غشي من جوالك
جوالي في يدي و فيه النت و في كل شي متوفر
بس عقلي مانعرف فين
الموت عجيبه
السنة الماضية في نفس الفترة توفى محمد الله يرحمه و يغفر له
كانت منوتا اليوم تقولي .. كل فترة اختبارات يعني لاهي يموت حد و تفوتك انتي الاختبارات في البكي !!
عارفين
انا لما نبكي على حد نعرفو مات .. خصوصاً لما يكون ماهو كبير في السن
مانبكي بس لانو فلان مات !
لاني ماتليت شايفتو !
لانو خلاص !
نبكي عليه اكيد لكن نبكي اكثر على نفسي
على الدنيا .. على القبر
طول الوقت يجي في بالي لو كنت انا المتوفية
اش كان وضعي .. كيف نقابل ربي
كيف و كيف و كيف
نخاف .. نرتعب
نبكي على ذنوبي و نبكي على انشغالي
نبكي على نسياني للموت .. ونبكي اكثر
لان تذكيرها جاني في اشخاص غاليين جداً عليا
استغفر الله العظيم يارب
...
قبل فترة جاني هذا المسج من عند امين
قريييت كل الكلام اللي مكتوب فالمدونة
أيآآآ انتي مبدعة
حسيت بــ سعادة لمن قريت التدوينات روحك الحلوه الطيبة المرحة الخبلة الزويقلة مدسوسة في كل حرف فالمدونة
شكراا لسعادتي ))
انا اليوم ممتنة لنفسي جداً
لأني كنت سبب في سعادته يوم من الايام
ولو كان سبب بسيط
خليتو يبتسم :)
الله يرحمه و يغفر له ويكرم مثواه و يحسن اليه
و يعف عنه وجميع موتى المسلمين يارب العالمين
و يرحمنا اذا صرنا الى ماصار اليه
آمين آمين آمين .
شكراً أمين لأنك كنت من أكثر الاشخاص
الي اثروا في حياتي بشكل ايجابي
كنت شخص مميز و ستبقى دائماً
و نوعدك نحكي اولادي عنك و عن جنونك
و نسمي ولدي الثاني اللي ماهو محمد
نسميه أمين
نوعدك يا أمين ..
على فكرة :
نصيحة مني و اسمع قول مبكينك ولا تسمع قول مضحكينك
لعدتو مزعلين او مزعلكم اي حد غالي عليكم
مهما كان السبب و مين ماكان الغلطان
ننصحكم تنساو الموضوع
صالحوهم و و دلعوهم و حسّو بيهم سابق لا يموتوا وتندموا
ممكن اي وقت يجيكم اتصال بخبر وفاة حد منهم
وقتها مهما كان غضبكم عليه راح تعرفوا مدى سخافة تفكيركم !
تصالحوا مع انفسكم و عيشوا صح
الدنيا فانية .. و اليوم و بكرة او بعده
كلكم للموت ..
والنصيحة مني لي اولاً بالتأكيد !
لآ حول ولآ قوة ألآ بالله
ردحذفعظم الله أجرك حبيبتي ..الله يرحمه ويجعل مثوآه الجنة
اهم شي لا تنسيه من الدعاء ..الله يجمعك ويجمعنآ يأحبآبنا في الجنة
اللهم ارحمه وادخله جنات الفردوس الااعلى يارب العالمين ولاحوله ولاقوةالابالله الله يرحمك ياامين عمري مارح ننساك ولاننساء ظحك انت وخدوفيايلين انعود ننظحك وانقول اه اه ليش كذاالدنيا يارب ليش انااخرمره كلمتو قبل الحادث بليله كنت نظحك معاه وقالي روحي مشتسفى المجانين قتلوروح انت اتنحروتمشي معايه والله اقعدناانظحكو واناجنبي امي وتقولي انتي ذاالي امظحكك الاهذي الدرجه شنهوواناانقوله لحظه لحظه ويالين نوعه الصبح يقولي داده امين اعطاك عمرويارب اناساعتين من صدمه وكل لحظه شفت فيه امين واتكلمت معاه واظحكت معاه مرة ابتفكيري ليش كذاليش الله يرحمويارب ويغفرلو ويجمنامعاه فالجنه يارب والله راح اتم الافبالانا ومانه لاهي ننساوه خلاص ماتليت كاده نكتب بياالبكي الله يرحمو انشالله والله عدة انخاف من هذي الحياة ونخاف من الموت في امان الله ياامين بوكه وعين الله ترعاك اختك الي ماهي لاهي تنساك سوسو الااسم الي اتقولي انت الله يرحمك ربي
ردحذفلاحول ولا قوة الا بالله
ردحذفاللهم ارحمه و اغفر له
اللهم اغفر له وارحمه واكرم نزله وصبر اهله يا رحيم
ردحذفانا لله وانا اليه راجعون.. الله يرحمو ويغفرلو ويرحمنا ويغفرلنا اذا صرتا الى ماصار اليه..
ردحذفلا حول ولا قوة الا بالله
تقبلو تعازينا القلبيلة و عظم الله اجرنا واجركم والهمكم الصبر والسلوان