و ساعات بنشوف الحب وهو مابيشوفناش
و ساعات يقابلنا الحب و يمشي معرفناش
اوووف ريحة الغبرة و بيوت الرتلة عادو هون !
انا فين كنت ؟ مانعرف !
توحشت المدونة ماتخيلت اني لي شهرين عنها !!
يا الله كم انا فراية و ماني شي !
والله توحشتها وتوحشت الثرثرة :(
الشهرين الي فاتو مرّو بسرعه ماحسيت بالوقت !
غريب ! شي غريب !
في حد تعين فيها ولا معدلي سحر وماتليت نخشها ! يالهوي لابدالي نگلع عنها النظرة ولا نحرزها و لا نجيبلها شي من تراب اهل ابّوها ول مصطافه !
ذا ماهو عل بابو ! يالصالحين
يابويا و بوه .. گعدو من تحتو الين تجيبوه ^^
<< موجبو باط ^_^
عارفين
الايام الماضية القريبة كانت اكثر الايام ازدحاماً بالنسبة لي في هذه السنة الجميلة الغريبة المتشقلبة !
ارهاق و مكياج و جهد و شياكة و تفكييير و سهر و تصفاگ و هملة و كثير من الابتسامات بعضها مصطنع و بعضها نابع من عمق قلبي :)
الحمدلله رب العالمين
الانسان في حالة هذا الضغط ممكن يرتكب اخطاء كثير !
انا شخصياً في هذه الايام كانت صنعتي شوينة و كساحه و صكاكه و كل مازادت المسؤولية عليا كل مازدت في اللامبالاة بالاخرين !
للأسف
اكثر من مرة ننتبه و نندم لكن مايكون في مجال للاعتذار و نواسي نفسي بأن الناس مقدرين تعبي و ارهاقي :/
الله يسامحني بس
في نفس الوقت تعرضت لكثير من التجريح و الاهانات النفسية في عدة مواقف و بدوري سامحت و مسحتها فجلّي !
و هذا الطبيعي
الجميل في الامر اني جبرت اكثر من فرصة نختبر فيهم قدرتي على تحمل المسؤولية
صراحة طلعت بطلة ! بس مش كتير
الصراحة في مرات توليت مهام و خسرتهم
زي ترواق لعروص مثلاً !
انا خبله ! قط شفتو حد لاهي يروق عروس يتفق مع اصحاب العريس ؟
انا عدلتها و طبعا وحلوني و حكمونا و طارتلنا الكشة و البنات بطوني :(
بس نستاهل معيگبني !
المهم
في ليلة مجنونة اضطررت نمشي مع صاحبتي العروس للمستشفى " طب ابن سيناء " في وقت متأخر من الليل و كانت مزالت دايرة الحب و حفولات لعروس و ذاك النوع ..
ياخي مانبقي نكمل لمردة !
<< مين ياخي ؟
المهم اننا صادفنا واحد راجل كبير
ادعى انو صحفي من موقع الاخبار و حاول يصورنا و قال انو لابد ينزل عنا خبر !
انا ماعرفت فين الخبر تحديداً و فين التشويق ! كونها عروس مريضة !
هو غبي ! و ما استغربت لأنو صحافتنا معودتنا على السخافة
التقط صور و ماخليناه يصور وجوهنا طبعاً
انا انفعلت و قلتلو حتى انا صحفية
و لو شفت لنا صورة في النت ندور نرفع عليك قضية !!
<< فريدة الطوبجي على غفلة
و ماشفت خبر عننا في موقع الاخبار و لاشفت شي
بس طعنني متن وجهو !
شاك انو صحفي معناها انو لو الحق
يسول عن مابدالو !
تخلف !! استغفر الله بس
ذاك اليوم كنت في تاكسي قايسه عرفات
وانا في الطريق تذكرت صاحبة لي فم
قلتلو يوقفلي عندها ..
و صراحة السبب الي خلاني نتذكرها هو مدى الازدحام الي كان عليا في التاكسي
يا الله قد ايش خنقوني الله يسامحهم :(
نزلت عند دارهم و جيت بدون ما نتصل ولا شي و معدلتهالها مفاجأة !
تفاجأت ان الغبية قاست البادية بدون ماتعلمني :(
حسيت بالاهانة !
شعور بايخ لما تكتشف ان الي انت مهتم بيهم مش فارقة معاهم جهودك
جداً بايخ .. مع اني نعرف ليش ماعلمتني و عاذرتها .. بس جد خلاتني نجرب شعور اشخاص نعرفهم !
دايماً نتعمد نجرحهم بالتجاهل و اللامبالاة !
خرجت من دارهم و قررت نكمل مشواري الى حيث كنت ذاهبة اصلاً على كرعيا ..
كنت محتاجه نفكر .. صادفت كهلة عجيبة
خاظت عليا و قالت السلام عليكم
رديت السلام و رفدت فيها وجهي !
كهلة مبتسمة بيضا بيضاء تبارك الله و لابسة ملحفة كحلة بس عينيها
و ماحولهم لونه احمر فااااقع
محنيتهم .. و باقي الوجه ابيييض طبيعي
اول مرة نشوف حد يحني عينيه !
استغربت !
المنظر المفروض يكون مخيف ، بس هي كانت جميلة .. عجججبني منظرها :)
و مريت على ناس ماخلاو لون في الكرة الارضية مادارو منو شوي في دارهم
الوااان كوكتيل ! ذوق غريب
ذكروني بأمنية كانت عندي زمان
اني نسكن في بيت كل حيط منو لون مختلف
وانا مندهشة نخرص دارهم خرجت من عندهم امرأة املي لابسة ملحفه ملونة !
لا ارادياً ضحكتلها ^_^
بس للأسف كسحتني و تمت مكشرة !
الالوان مش دايما تعكس فرحنا و لطفنا
و السواد مش دايما يعكس حزننا و قسوتنا
ياما ناس في حال اسود و سعادتهم نور !
و ياما ناس على قوس القزح و دموعهم مطر !
غريبة الدنيا
فيه اوقات وانت وسط قمة الفرح و الضجيج و العالم تزغرد و ترقص و تغني
تحس للحظة انك تبقي تنسحب و بهدوء تلجأ الى اقرب وسادة و ترقد !
و اوقات ثانية وسط الهدوء و العالم راقدة و الجو آخر صمت .. تحس انك تبقي تقوم ترقص و تغني !
!!
كل مرة تجيني فكرة و نقوم نلود لجوالي
و نفتح التدوينة و نبدا نكتب
نكتشف اني نسيتها !
احيانا نكونوا محتاجين نجربو اشياء ماجربناها حتئ لو خطأ .. من باب لقبا و تعدد التجارب و شفاء الفضول !
انا مانحرض على الخطأ بس نحاول نشجعني على اني نغامر
صارلي فترة متجمدة
و ماني عارفة نتخذ اي قرار في اي شي
و ماني حاسه بمتعة في اي شي
حتى وانا نضحك و نلعب و نفرح و نبكي
في نقطة متجمدة في روحي
تخليني كل فترة و فترة نوقف
نراقبني و ننتبه اني متجمدة
و نفس الاحساس يصير لكل الناس
و نفسو هو الي توصفيلي
و شاكة اني ماني فاهمتك !
هي حالة بادة ياصديقتي و سببها مزال غامض بس لا تخافي .. سنحيا اكثر و نحب اكثر و نمرح اكثر و سنلتقي :)
في ليلة ماضية في رمضان فطرت
عند مليكه
كانت ليلة عجيبة مليانة دموع كنت بائسة فيها !
انا اصلاً بيتوتية مانخرج الا لما نكون بائسة
المهم لما جيتها واول مادخلت
سلمت على مامتها و بابا و دخلت المجلس
اول ماقفلت الباب انفجرت و قمت نبكي
وانا نبكي و هي تضحك
و نحكيلها عن المشكلة السخيفه الي عندي
وهي تضحك و تضحك
نقولها لا تضحكي وانا نبكي !!! و تضحك الشريرة :(
و لما عرفت انها عديمة احساس بدأت نوكل و خليتها تضحك وحدها !
لا و توفا من الضحك و تعدل انها جدية و تسولني انا امالي ؟
واول مانبدأ نتكلم تنفجر ضحك ! حيوانة !
أحياناً اصدقائنا مايعدلو شي ملموس عشان يخففو عنا !
بس مجرد وجودهم يخفف كثييير من غير مايحسو ! حتى سخريتهم في دموعنا تشفينا اوقات !
و نحن نطوجنو عطاتني شي نسيت اسمو
زي التمر لكن حامض قالتلي جربيه
قلتلها لااا مانحب نجرب اشياء جديدة
غير مع اشخاص جداد !
قالتلي حته انا ..
فكرنا فيها بصمت لوهلة و ضحكنا
واكيد كل وحدة منا كان قصدها شي ثاني ماهو التمر الحامض ..!
مش حتفهموا الفكرة
المهم اني انا فاهمتها !
مع ان زيارتي لمليكه ذيك كانت
مملة و كئيبة زي ماقالت .
بس بكيتي عندها و فضفضتي لها
وكلامها لي اني سخيفه و غبية و مبلوووگة و بياض لكلى ولاّ تعبير فم تقولو هي
اني خاسرة و صنعتي شوينة !
كل هذا ريحني شوي مع انو كلو ظلم وافتراء :(
الفكرة انو احياناً نكونوا محتاجين شي سخيف سخيف حتى لو من شخص سخيف زي ملكلك D:
بس يشكل فرق كبير في احساسنا !
حافظوا على اصدقائكم و ابداً لا تصدقوا المقولات الي تقول احتفظ باسرارك لنفسك و لا تشكي و لا تبكي لحد !
هذه انا نقولها اوقات بس كلام فاضي
نحن دايما محتاجين لاشخاص يمتصوا غضبنا و ضيقتنا !
اشخاص نظيفين و لا تتخيلوا انهم نادرين !
الدنيا مليانه بشر طيبين
حتى الي يتعاملو بخبث و بحقارة اوقات
لازم يكون بداخلهم روح طيبة فطرية
حاولوا تكتشفوها و تلمعوها و تشجعوا اصحابها يظهروها !
لا تكونوا انانيين و دايما تلودوا للناس الي جاهزة للاستعمال !
البشر زي البيوت غالباً تكون محتاجة ترميم قبل لا نسكنوها .. حتى لو كانت جديدة !
انا شخصياً واعوذ بالله من كلمة انا
فاشلة في ترميم البشر !
و دايماً نسحب قواتي لما نشوف اشخاص عندهم مشاكل مثلاً قلوبهم متصدعة او عقولهم مغبرة !
ننسحب لأني نخاف !
و ماهو لأني مانثق فيهم بس لأني مانثق فنفسي كفاية ! و هذا غباء و ضعف مني !
و نحاول نتعلم و نحاول نكون قوية و نحاول نرمم نفسي عشان نكون قادرة على ترميم من حولي !
في الليله ركبنا تاكسي وكان فيها شباب
و السواق اثرو صاحبهم
قعدو يتكلمو ويجوقو
وكنت نتمنى نعود مسلحة و نغتالهم
سخيييييفين حوارهم سطحي جدددداً
ولا و قايسين اتكسكادي " التفحيط " في لكصر
وهوما شباب كبار .. عدت الا نكرر
جيل فاسد .. جيل فارغ !
و تقولو ثورة و تغيير !
ثورة مين و شبابنا بذي السخافه !
بس الحق لله ضحكوني شوي
يجوقو فواحد منهم قالولو انت ماتبقي وحدة ماقبظوها الضروس و خلات خيمتها
قالهم لاهي نلود لوحدة فمها طايح قاع و الراحة !!
ماشكات عليا الي لاهي يشدها بعد !
في الفترة الي فاتت جددت
ووسعت دائرة معارفي شوي
مبسوطة بالاشخاص اللي زادوني و ان شاءالله يكون وجودي في حياتهم زيادة حلوة :)
بعض المواقف نعيشوها بدون تخطيط و تطلع اجمل من الف تخطيط
انا مخططة فاشلة و دايما نعيش مواقف فوضوية نتصرف فيها بعفوية
و دايما ابدو غبية او دايما مانحاول نصحح صورتي
يعني من الاخر مريحة مخي
اناا نعدل الي مناسبني و كل شخص يفهم بطريقتو !
بس
لا ماهو بس
مؤخراً اكثر من شخص قالولي اني معقدة نفسياً !
صراحة انا حاسه ان هذا مؤشر ايجابي !
و مانعرف ، ماني فاهمة !
لما نحكم على شخص انو معقد نفسياً او مريض نفسي لمجرد اني مافهمتو !
او لأنه هو ماسمح لي نفهمو !
هذا ظلم اولاً .. ثانياً انا كذا نعطيه تصريح بالانتحار الي عاد مؤخراً حل للمرضى النفسيين !
بس عادي انا الظلم نحتسب أجره و نفرح بيه
و الانتحار مستحيل ننتحر !
لأني مستحيل ننتحر
و عليا بجامع لايمان ماننتحر زاد p:
على فكرة نمزح ^_^
و اصلا انا فخورة اني معقدة نفسياً
لا .. فخورة اني معترفة بيها
اما في الواقع قال سيلو و قوله مشكوك
عن موريتان كاملة معقدة نفسياً و مجانين !
المهم
الساعة ٢ و ربع بعد منتصف الليل
انا فوق سطح الدار القمر مقابلني
صارلو ساعة مراقبني و كل شوي نرفع عيني فيه و نقولو
شيل عيونك عني تركني اعرف اكتب !
و الجو هادي و ماعندي افكار كثير نكتبها
بس حابه ننزل تدوينة الليلة كما وعدتكِ
فإذا طلعت سخيفة او غير مفيدة ولا مسلية
فأنتِ السبب !
البارح انا و فوف كنا هون الفوق الساعه ٣
طلينا على الشارع و كان الجو هااادي
ومافي انس يحرك !
كنا مشغلين الست تغني امل حياتي
و بدأنا نغنو معاها بصوت عاالي و لان مافي حد عشنا الجو و نغنو و نغنو !
بعد ياسر لمحنا سيجارة في وسط كومة حديد و اخشاب في لباتيگ الي تنبنى قدامنا !
ركزنا !!
اكتشفنا انو حارسهم و قاعد و مكيّف يسمع !
هو كَوري و
مااظنو انطرب بس اكيد استمتع بالضحك على جنوننا !
زوينة الحياة و الله زوينة !
حتى و هي مملة و رتيبة
نقدو من كل نقطة صغيرة ندبرو مشهد ممتع
و نفرحوا بيه !
نكره حد يفرض عليا رغباته بدون مايسأل انا اش نبقي ؟
يستفزني الي يهمّش افكاري و يتمحور حديثه كلو حول انا ندورك تعدلي و انا فكرت انك تعدلي و انا قررت ..
انت مييين ؟ وانا شنهو دوري !
عالم غريبة و ذا الحوار ماني فاهمتو
بس انتبهوا انو دايماً مهما كان الشخص الي تتعاملو معاه هاديء او صغير او يحبكم او مسالم او حتى اهبل او حتى مجنون !
عندو رغبات و امنيات و يفكر و بشكل فطري إلهي يعرف يفرق بين الاشياء الي تحرروا و تريحوا و الاشياء الي تقيد احساسه !
تعاملوا معاه انو كيان انو فكرة انو شخص
مهما كان حجم مسؤوليتكم عنو او خبرتكم اكثر منو !
شكراً لأنكم تفتقدوني
و شكراً لأنكم تبتسمولي .، او تبتسموا لنفسكم !
شكراً لأنكم بشر و تحترموني ك انسانة تائهة في دروب الحياة :)
ملاحظة : التدوينة القادمة ستكون ثرية جداً بشيء لا أعلم ماهو بعد ..
لكنني متأكدة من أنه شيء عظيم !
انا انتظره .. و انتظروه بقربي :)
سأرويه لكم إن حييت بعد حين :)
أراكم بخير
أحبكم طبعاً و يعملها ماهي مگسومة :)
كبري كتبتك اشوي :)
ردحذفو كبرناه :)
حذفدائما ماأحس بالملل وأناأقرأ النصوص الطويلة
ردحذفلكن حدث لي العكس مع تدوينتك الجميله هذه , خفيفة وجميلة إلى درجة أني تصورت نفسي جزءا من الحدث
لاتغيبي لشهرين آخرين , اتوحشنَ فضفضتك ;)
شيخاتو .. شرف عظيم لي يابشمهندس :)
ردحذفشكراً لك اسعدني تواجدك هنا جددداً :)))
a7 4e 6wil :v
ردحذفقسّمو على 3 ايام وتوف .. مع انك قاع اصيب من شي قاد الا تقراه P:
ردحذفتلهميني
ردحذفوبإذن الله ناوية نتم نكتب زيك ماهو يوميات يمكن اسمو تخرميز
المهم اني لاهي نتمم نكتب
اممممممم
واش كمان
صح بكيتيني الين تكلمتي عن مقابلتك مع بابتك في المطار
ياوني بيه والله اني حبيتو من كلامك عنو ياوني بالابات كااااملين
تدري؟؟
من خيالي الواسع أغلب الأشياء اللي نقراها نتخيل اني انا البطلة ولا ماهو شرط البطلة الشخص اللي يعجبني في الشي اللي انا قاعدة نقراه
الااااا تخرميزاتك انت ماندري ليش مانتخيلني انتِ
ماعرفت نفسر الموضوع
يمكن عشانو حكاياتك حقيقية
المهم خلي عنك مريداتي انا لخويمرين
وكملي كتابة
أنتِ رائعة :-)
حبيبتي ، شكراً ع الاطراء والتشجيعات الحلوة اللي مانستاهلها :)
ردحذفو بالنسبة لخيالك الواسع الي عجز يتخيلني انتي .. يمكن لأني ماعجبتك p: او يمكن زي ماقلتي لانو خبالاتي واقعية وكلها مرتبطة بأشياء موجودة فحياتي فعلاً !
المهم انو نورتيني و ننصحك وننصحك ومن جد ننصحك تكتبي
ماراح تندمي ابداً ,, شكراً لك جداً :)