لعل القلوب تأوب إليك .. و أصحابها يذكرون الهدى
بحبك يارب قلبي شدآ ...
الموود معكر شويتين
اللي حاسس انو مبسوط لا يقرا عشان مايتعكر ويحطها عليا L
حاسة إنوو في شي في داخلي تغير بقوة . !
صار في غصة عالقة في صدري طول الوقت
حتى وانا نضحك أو راقدة او نذاكر او في قمة مشاغلي السخيفة
ماتليت نحب الحياة زي زمان مع إني جداً مرتاحة و ماني متشائمة ومبسوطة من نفسي J
بس يمكن من كثر ما صرت نسمع ونشوف الموت في الناس اللي حولي
صرت نحس ان الدنيا كلام مرررة فاضي
حتى الأشياء اللي كانت بالنسبة لي كل شيء صرت نشوفها عادية
صرت نقد نستغنى عن أي شي وأي احد وممكن عن كل شي وكل احد
بطلت نتعلق في الأشياء بقوة زي ماكنت.
أو نحزن أو نفرح بعنف زي ماكنت ..!
صرت أي شيء نفكر نسويه أو نتمناه , نفكر قبله ألف مرة إذا كنت نقد نعيش بدونه .!
إذا كان ضروري ولا لا .؟ وليش نبغاه ..؟ وووو ...!
ماتليت إنسيابيه وعفوية L
مانعرف اذا هذ الشيء غلط ولا حلو؟
بس انا تغيرت وماني قادرة نلاقي نقطة التغيير فيا
وماني قادرة نسيطر عليها :/
أنا بالعادة لما يكون عندي خبر إني رايحة مكان معين
مثلاً , رايحه مع ماما عند ناس
ماتليت نرتاح الين مانروح ونخلص ونتم الا نسأل ونفكر اش لاهي نلبس وكيف لاهي نمشوا
ومتى لاهي نرجعوا ومين لاهي يكون عندهم وأتفه أتفه التفاصيل وطول الكرة
وهذا يقولوا له البيظان ( آكَرآآآن )<< بتخفيف الراء
وبالتحديد اكَرآن هذا هو اللي قابظني طول الوقت ,!
متكَرنة بمشوار موتي المحتم ويوم الثواب والعقاب
ونبغى نعرف اش لاهي يصيرلي وكيف ومتى وفين .!
وخايفة نزيد ذنوبي في كل يوم نعيش فيه وخايفة مانفوز وعارفة إني مانستاهل
بس عارفة ومتيقنة ان ربي كريم ورحيم ورؤوف بعباده
و مرعوووبة من العقاب بشكل خيالي
في شي فداخلي يقولي ان هذا الخوف نوع من الإيمان ب قوة و جبروت الله عزّ وجل
وفنفس الوقت في شي يوسوسني ان هذا الخوف من الجهل برحمة و لطف الله عزّ وجل .!
بس الخوف مايفارقني زي لما الواحد يختبر لمدة 23 سنة
ويجتهد أوقات ويكسل أوقااات ويغيب أوقاااات
بس ماهو قادر يحدد الليفل تبعو ولا يتوقع نتايجو ..
ويستنى يوم التخرج على نار مع انه مايعرف اذا راسب ولا ناجح ..!
كلااام غبي في راسي ونخاف نقولوا ونحس انو غلط بس يخنقني
وماني عارفة نحدد إذا كان ضميري الصاحي ولا النايم هو اللي يمليه عليا ..!
اللي فاهم يفهمني بالهداوة
واللي ماهو فاهم يسهي لايزيد الطين بله :(
والمؤلم ان البشر ذي الايام صاروا يعتبروا اللي يتكلم عن الموت
او يجيب سيرة الموت متشائم ويائس من الحياة وجايب الآخرة
ع اساس اللي ناسي الموت مايموت
ولا اللي مايفكر في الآخرة لاهي تفوتوا ..!
الدنيا حلوة وانا نبغى نعيشها بأحلى تفاصيلها
ومع كل الناس اللي نحبهم
بس نحس انو غلط نضيعوها فحاجات غبية
يعني ع الاقل لو ما راح عمرك وانت تتعبد وتستغفر ربك
لا تخليه يروح وانت شايل فقلبك حقد وزعل وكدر على دنيا راايحه
كل مانزعل من شخص
كل مانتضايق من موقف
كل ماتنزل دمعة من دميعاتي على شي من امور الدنيا
نتذكر موال من اغنية << ايوة اغنية *_^
ولو اني ولله الحمد والمنة صارلي فترة ماتليت نسمع يكون
اغنية مسلسل متابعينو اهلي في الصالة
وكل يوم نسمعها في البداية والنهاية تقول : هذه الروح تشتاق اليك
هذه الروح لك تشتاق وبس ^^
المهم نتذكر مقطع من موال حافظتو من زماان يقول :
نفسي التي تملكُ الأشياء ذاهبةٌ
فكيف أبكي على شيء اذا ذهبا ..!؟
<< ذي الكلمات تهزني هززز فظيع :/
يارب ثبت قلوبنا على دينك وطاعتك
يارب نور صدورنا بالطاعة والإيمان
وبشرنا بجنة الرضوان
وكل اللي يقرا كلامي وقال آمين
يارب نشوفو في الجنة ونعطيه اللي يتمناه
<< لاهي نصير غنية ان شاءالله :)
في كلُ مرة يتجاوزنا الموتْ إلى غيْرنا
لكن . . سَ يأتي اليوم الذي لنُ يتجاوزنا ٳلا .. بنا حينها ،
... سنعرف ٲنّ الرسائل التي يرسلها اللہُ لنا في كل مرھ . .
كم كانت ، اكُبر من معنىَ ( الغفلة )
يَا ربّ نسألك حَسن ﺂلخاتمهَ .
<< شفتها قبل شوي في الفيس و لفتت إنتباهي بشكل غرييييب ...!
نفسس اللي خالق لي :(
ردحذفقدرتي تطلعي اللي في قلبي بدون مانحتاج نكتب او نشكيها لااقرب شخص
ياعيوني انتي
ردحذففي كثير مواضيع صعب تشكيها للناس
وعشان تطلعيها منك لازم تكتبيها
حتى لو تكتبيها في ورقة وتشقيها
حترتاحي :)
منورتيني اكثر شي وربي :)